Kryeministri Edi Rama ka lënë mënjanë modestinë teksa deklaroi se Reforma në Drejtësi po bëhet e mundur vetëm për shkak të nismës së Partisë Socialiste.
“Reforma në Drejtësi s’do të ishte e prekshme nëse PS s’do e kishte marrë përsipër”, kështu u shpreh Rama sot gjatë një aktiviteti të titulluar “Reforma në Drejtësi sipas perspektivës evropiane”.
Më tej, Rama deklaroi se integrimi në Bashkimin Evropian nuk është qëllim në vetvete dhe as për ‘i bërë qejfin dikujt, por sipas tij, është një materializim i aspiratës për ta bërë Shqipërinë evropiane dhe më të mirë për fëmijët në të ardhmen, raporton Tirana Today.
Fjala e Ramës:
Do ishte e pamundur të shkonim drejt çeljes së negociatave pa Reformën në Drejtësi. Ia dolëm që në mandatin e parë të bëjmë një përmbysje historike të raporteve të klasës politike me këtë reformë, e cila në 25 vjet nuk u ndërmor dot asnjëherë me të njëjtën fuqi dhe me të njëjtën ambicie.
Kjo i dedikohet Partisë Socialiste, që mori përsipër rrezikun dhe rrezikoi të humbiste mundësinë për qeverisje, për shkak të një përpjekje me synimin rrëzimin e qeverisë, me synim bllokimin e Reformës në Drejtësi.
Reforma do të ndajë Shqipërinë e të paprekshmëve nga Shqipëria e të gjithë si të barabartë para ligjit.
Integrimi ynë në BE nuk është qëllim në vetvete, por është materializim i aspiratës për ta bërë Shqipërinë evropiane dhe procesi i integrimit nuk është një proces ku kemi hyrë për t’i bërë qejfin dikujt, por për të përmbushur një detyrim ndaj fëmijëve tanë. Shqipëria në BE është projekti i gjeneratës tjetër, që kemi për detyrë ta çojmë përpara. Luftojmë për çeljen e negociatave jo për t’u dukur më mirë para të huajve, por për të bërë më mirë për fëmijët tanë. TIRANA TODAY
