Rrëfehet Neymar/Nga miqësia me Messin tek “fërkimi” me Cavanin

Neymar është duke përparuar në rikuperimin pas operacionit në këmbën e majtë, të cilën e dëmtoi në përballjen me Marseille në “Parc des Princes”. Duket se ai do të jetë gati dhe në një formë mjaft të mirë në prag të Botërorit “Rusi 2018”, i cili do të startojë vetëm 2 muaj më pas.

Gjithsesi, në një intervistë të dhënë për “O Globo”, braziliani ka bërë një kthim në të kaluarën dhe ka folur për atë që ka ndodhur 18 shtatorin e kaluar në “Parkun e Princave”, gjatë ndeshjes Paris Saint-Germain-Lyon. Ajo sfidë është mbyllur 2-0 për vendasit, por kjo ndeshje mbahet mend për debatin e zhvilluar në fushë mes ish-yllit të Barcelona-s dhe Edinson Cavani-t, të cilët janë përplasur për ekzekutimin e një penalltie.

Ylli brazilian ka kthyer mbrapa kohën dhe ka dhënë versionin e tij në lidhje me atë që ka ndodhur: “Ka pasur shumë tension, njëfarë fërkimi, por kemi zgjidhur gjithçka shumë shpejt. Tri ditë më pas jemi ulur dhe kemi folur. Jemi dy lojtarë të mëdhenj, por jemi edhe njerëz dhe gjëra të caktuara duhet t’i zgjidhim mes nesh, pa përfshirë të tjerët. Të tjerëve u pëlqejnë të zmadhojnë gjithçka dhe kjo mund të ketë një ndikim negativ brenda ekipit”, ka thënë Neymar.

Neymar foli edhe për miqësinë me Lionel Messin, e nisur në pushim të një ndeshjeje në vitin 2013. “Më pa duke qarë, sepse nuk kisha zhvilluar një pjesë të parë të mirë. M’u afrua dhe filloi të më fliste: Duhet të jesh vetvetja, luaj ashtu siç di dhe mos u frikëso.”