Roma me fitoren minimale 1-0 një natë më parë në “Olimpico” përballë Shakhtar, siguroi kualifikimin në çerekfinale të Champions League. Autori i golit ka qenë Dzeko, por, siç kanë kujtuar edhe vetë lojtarët e Roma-s, kualifikimi është arritur falë topit të larguar në vijën fatale nga Bruno Peres në ndeshjen e parë.
Në ndeshjen e parë në Ukrainë, kur ndeshja ishte 2-1 dhe luhej minuta e fundit, braziliani ka larguar në vijën fatale topin e goditur nga Ferreyra. Një episod ky që, duke parë edhe rezultatin e djeshëm, ka qenë vendimtar. “Bravo djema! Jemi në çerekfinale, – ka shkruar Juan Jesus në Twitter. – Ëndrra fillon tani. Kopeja ka uri, tani më shumë se kurrë!”.
