I janë dashur vetëm 6 vjet këngëtares me origjinë shqiptare Rita Ora, të hyjë në historinë e muzikës britanike. Ajo është këngëtarja me më shumë këngë “single” në dhjetë vendet e para. Ajo renditet në bazë të klasifikimit muzikor zyrtar të muzikës, UK Charts.
Rita Ora, me këngën e fundit “Let you love me”, thyen kështu një rekord të mbajtur prej 30-vjetësh. Kështu ajo ka kaluar rekordin e ikonës së muzikës britanike Shirley Bassey.
Rita Ora do të nxjerrë albumin e saj më të ri “Phoenix” në fund të nëntorit. Ndërkohë që nga qershori i vitit të kaluar pesë nga këngët e saj kanë qenë çdo herë në dhjetë këngët më të mira. Kjo e dhënë është në bazë të klasifikimit të këngëve më të mira në Britani, të njohur si UK Charts.
Këngëtarja me origjinë shqiptare, sipas The Sunday Times të Londrës, bashkë me yje të tjerë të muzikës vendase i kanë dërguar një letër kryeministres britanike Theresa May. Ata e kanë paralajmërojnë për rrezikun e Brexit ndaj industrisë muzikore britanike. Sipas tyre do ketë tronditje duke filluar nga turnet muzikore, shitjet, dhe legjislacioni për të drejtën e autorit.
Vitin e kaluar, industria britanike e muzikës pati një rritje prej 10 përqind. Thuhet se është kapur shifra e 92 miliardë stërlinave. Në letrën drejtuar Theresa May, ata paralajmërojnë se aksesi ndaj muzikës britanike do të sfumohet duke e shndërruar atë në një “burg kulturor”.
