Mbrëmjen e sotme emisioni “Stop” ne TV Klan pati në qendër të investigimit avokaten Natasha Shehu. Një personazh që shqiptarët e njohin mirë sidomos pas procesit penal në Itali për tragjedinë e Otrantos, ndodhur në vitin 1997. Në këtë proces Natasha Shehu përfaqësoi familjarët e viktimave të tragjedisë, por pas fitimit të gjyqit familjarët e paditën atë pranë drejtësisë italiane.
Ata e akuzuan Shehun se kishte përvetësuar dëmshpërblimet të cilat shteti italian u dha për shpirtrat e të afërmve të mbytur në Otranto. Për të justifikuar paratë e vjedhura Natasha Shehu publikoi në shtypin shqiptar të kohës një histori sipas së cilës ajo ishte vajza biologjike por e mohuar e ish-kryeministrit shqiptar Mehmet Shehu. Një deklaratë që bëri lëmsh mediat në Shqipëri dhe që me gjasë u bë për të justifikuar pasurinë.
Sa duket pasi ka dështuar si avokate në shtetin fqinj Natasha Shehu është rikthyer në vendin e saj të origjinës të ushtrojë profesionin e avokatit. Por emisioni “Stop” ka zbuluar se edhe në Tiranë, Natasha Shehu nuk ka hequr dorë nga zanati i vjetër i mashtrimit. Një qytetare e ka akuzuar atë se i ka marrë një sasi të hollash pa i kryer shërbimin e premtuar si avokate. TIRANA TODAY
