Pas takimit informal mes kryeministrave të Ballkanit Perëndimor në Durrës, Rama ka folur para kamerave, ku ka reaguar për herë të parë lidhur me debatin e rikthimit të vizave nga Holanda.
Duke mos iu referuar drejtpërdrejt raportit të publikuar në Holandë, kryeministri tha se refuzon me çdo kusht shënjestrimin e shqiptarëve si kriminelë, pasi sipas tij, kriminelët janë persona që duhet të dalin para ligjit dhe nuk ka rëndësi kombësia.
“Refuzoj ta pranoj shënjestrimin e shqiptarëve si kriminelë. Kriminelët janë kriminelë, kudo pa dallim. Ata duhet të përgjigjen para ligjit. Nuk ka flamur, nuk ka kombësi dhe në këtë aspekt unë refuzoj çdo përpjekje politike për të treguar me gisht si krim shqiptar, ballkanik apo nacional. Të bëjmë çmos në hapat e integrimin, bashkë me komisionarin folëm që po bëjmë të pamundurën në luftën kundër kanabisit. Në fund të këtij sezoni, Shqipëria do dalë përfundimisht nga harta e vendeve problematike lidhur me kultivimin e lëndëve narkotike”, tha Rama.
Gjithashtu, Rama bëri me dije se ka një plan veprimi prej 115 pikash, të cilat synojnë transformimin rrënjësor të rajonit:
Është e qartë tanimë që kemi një plan veprimi me 115 pika në funksion të një transformimi rrënjësor në kuadrin e lëvizjes së mallrave, shërbimeve, kapitalit, punonjësve të kualifikuar që ta bëjë rajonin shumë më tërheqës. Për ta mbyllur me këtë pjesë jemi vërtetë shumë të inkurajuar nga fakti që në nivelin politik ka një dakordësi të plotë.
