Gjermania është turpëruar në ndeshjen e parë miqësore që ka zhvilluar përballë Austrisë në kuadër të përgatitjeve për Kupën e Botës, pasi është mposhtur me rezultatin 2-1. Një rikthim i hidhur për portierin Manuel Neuer i cili kishte rreth një vit e gjysmë që nuk zbriste në një fushë të blertë për shkak dëmtimi. Dy gola të pësuar në ndeshjen e tij të parë, vështirësojnë edhe më shumë pozitat e portierit që dëshiron të rifitojë vendin e titullarit në portën e Gjermanisë për Botërorin që nis në Rusi pas vetëm pak ditësh.
Gjermanët kaluan të parët në avantazh, duke përfituar nga një gabim i portierit austriak, është Ozil ai që dërgon me një goditje të bukur në rrjetë. Të besuarit e Low vazhdojnë të dominojnë në fushë me raste dhe zotërim topi por vetëm kaq, pasi nuk e gjejnë më portën.
Një epërsi dhe superioritet i gjermanëve që ka zgjatur deri në minutën e 53’, kur Austria ka barazuar rezultatin. Ishte Martin Hinteregger ai që ka barazuar shifrat, pas një topi të servirur në mënyrë perfekte nga David Alaba, për të ndarë mes tyre Hector dhe Neuer, falë një gjuajtje me të djathtën. Ishte pikërisht minuta e 53’ që në fakt nisi një përmbysje surprizë.
Vetëm 16’ minuta më vonë, në të 69’, Alessandro Schöpf ka kaluar Austrinë në avantazh. Julian Baumgartlinger pasoi për Stefan Lainer në të djathtë të zonës së rreptësisë, aty ku ky i fundit ka shërbyer për Schöpf, që në tentativën e tij dërgon topin në rrjetë. Neuer i mposhtur dy herë brenda natës, për t’i dhënë Austrisë fitoren 2-1, pavarësisht reagimit dhe përpjekjeve pa rezultat të Gjermanisë deri në momentin e fundit për të shënuar.
Austria: Jörg Siebenhandl, Sebastian Prödl, Aleksandar Dragovic, Martin Hinteregger, Stefan Lainer, Florian Grillitsch, Julian Baumgartlinger, David Alaba, Peter Zulj, Alessandro Schöpf, Marko Arnautovic.
Gjermania: Manuel Neuer, Joshua Kimmich, Niklas Süle, Antonio Rüdiger, Jonas Hector, Sami Khedira, Ilkay Gündogan, Julian Brandt, Mesut Özil, Leroy Sané, Nils Petersen
