Një surprizë në stolin e Partizanit në prag të sfidës me Skënderbeun që do të startojë vetëm pas pak çastesh. Drejtori sportiv, Olsi Rama, ishte shprehur në një intervistë se ata nuk kishin ndërmend të paguanin pjesën e mbetur të dënimit, të trajnerit Sulejman Starova, si ç’kishin bërë me Trashin dhe Bathën. Por duket se në momentet e fundit drejtuesit kanë ndryshuar mendje dhe e kanë përmbushur dënimin duke paguar ndeshjet e mbetura me një shumë të konsiderueshme parash.
Në mënyrë të papritur, Partizani luan ndaj Skënderbeut me trajnerin e vet në stol, pas pesë ndeshjesh mungesë. Njëlloj surprize, që është mësuar vetëm pak minuta para startit të supersfidës së javës së 21-të të Superiores në “qytetin e serenatave”.
Ka qenë instistimi i “Bobit” për t’u kthyer në stol, qoftë edhe duke paguar vetë financiarisht, ai që ka predominuar në këtë rast, edhe pse Rama tha se veprimet e trajnerit në dy ndëshkimet e këtij sezoni janë të patolerueshme. Një “përforcim” me vlerë për “demat” në përballjen e ethshme me Skënderbeun kjo e trajnerit, por që duhet “të kafshojë gjuhën” tashmë, sepse është “recidivist” për organet juridike të FSHF-së dhe mezi e presin të “falet” para tyre.
