Kryeministri i Kosovës, Avdullah Hoti, konfirmoi sot se kishte rezultuar pozitiv në testin e koronavirusit.
Përmes një postimi në Facebook, Hoti tregoi se nuk kishte simptoma, përpos një kolle të lehtë.
Sipas axhendës së tij, Hoti ka vizituar sot komunën e Dragashit, ku është takuar me disa prej fermerëve. Gjithashtu ai ka vizituar edhe fabrikën “MEKA”.
Gjatë kësaj vizite, Hoti u shoqërua nga zv/kryeministri Driton Selmanaj, ministrat Arban Abrashi, Vesel Krasniqi dhe Besian Mustafa, kryetari i Komunës së Dragashit, Shaban Shabani, deputetë të zonës, si dhe përfaqësues institucional të nivelit qendror dhe lokal.
Fillimisht, kryeministri kosovar ka inspektuar punimet në rrugën Zhur-Dragash. Ai tha se kjo rrugë është e rëndësisë nacionale që shkon afër vlerës 7 milionë euro.
“Ka pasur mjaft vonesa, disa teknike e disa procedurale, por besoj që ministri është duke u kujdesur që të rritet dinamika dhe të përmbyllet ky projekt në afat optimal”, tha ai.
Më pas ai ka vazhduar vizitën në fabrikën për përpunimin e mishit “MEKA”. Vizitën e radhës në Dragash, kryeministri e ka bërë në fermën “Qendra” dhe fabrikën e tekstilit “Invers one”, të cilëve u ka premtuar se qeveria do t’u qëndrojë afër, duke i mbështetur të gjitha bizneset në veprimtarinë e tyre.
Në fund të qëndrimit në Dragash, Hoti zhvilloi një takim me fermerët e zonës së Gorës në fshatin Krushevë, të cilët kërkuan nga kryeministri mbështetje për investimet në këtë zonë, duke theksuar se turizmi malor dhe infrastruktura janë të domosdoshme për këtë rajon.
