Prokuroria ka dërguar një letër porosi në Gjermani lidhur me helmimin e 146 pjesëmarrësve në mitingun PD-së.
Dje Prokuroria ka bërë me dije se Mjekësia Ligjore në Tiranë ka kthyer përgjigje me shkrim se e ka të pamundur të kryejë ekspertimet e kërkuara për 146 të helmuarit.
Mjekësia Ligjore në Tiranë ka thënë se duhet të analizohen 32 mijë elementë për përcaktimin e lëndës që ka sjellë pasojat dhe për këtë arsye, ekspertimi është jashtë mundësive të saj ekonomike e njerëzore.
Brenda 48 orëve pritet edhe dalja e përgjigjeve nëse janë apo jo projektorët shkaktarët e helmimeve.
Ekspertët kanë dalë në një konkluzion përfundimtar në bazë të një eksperimenti të zhvilluar në kushtet dhe me projektorët që është mbajtur mitingu i PD. Në bazë të eksperimentit, rezulton se projektorët nuk e shkaktojnë problemin shëndetësor në formën dhe në masën që u është shfaqur më se 146 personave pjesëmarrës në mitingun e PD.
Pikërisht bazuar në këtë përfundim që pritet t’i shkojë edhe me shkrim Prokurorisë, grupi i hetimit ka administruar analizat e gjakut të personave të dëmtuar, për të kuptuar se me çfarë janë helmuar të dëmtuarit.
