Një revolucion i vërtet ka ndodhur me të rinjtë shqiptarë në kauzën e bamirësisë. Të rinjtë, vullnetar në fondacionin “Fundjavë Ndryshe” kanë arritur të kalojnë çdo lloj paragjykimi dhe kanë arritur të orientonin biznesin shqiptar drejt bamirësisë.
Në ABCNews është transmetuar dokumentari me titull “Revolucioni ‘Fundjave ndryshe”, në të cilin flitet për rrugëtimin e këtyre të rinjve.
Vetëm në pak më shumë se dy vjet, disa të rinj, që ende janë student, kanë arritur të injektojnë në familjet më të varfra shqiptare një shumë prej rreth 2.5 mln eurosh, që ka shkuar në ndërtimin e shtëpive, restaurimin, mobilimin e të tjera veprimtari bamirësie.
Dokumentari ishte konceptuar në një linjë kronologjike, ku u vendos theksi te mënyra se si lindi “”Fundjavë Ndryshe”. Drejtori i fondacionit Arbër Hajdari shpjegon si lindi idea se si u rrit pak nga pak “Fundjavë Ndryshe” duke u kthyer në një nga fondacionet më të suksesshme në Shqipëri.
Koha kalon shpejt, por çdo fundjave, nën drejtimin e fondacionit, vullnetarët dhe bamirësit kanë pasur mundësi të ndihmojnë ata më të dobëtit, ata që kanë nevojë, për ata që duan të shohin një fundjave si gjithë të tjerët.
Në dokumentar folën disa nga mbështetësit dhe organizatorët e “Fundjavë Ndryshe”, shpjeguan se si fundjavë ndryshe lidhte bizneset me ata që kanë nevojë. Saimir Kodra, Ermal Mamaqi dhe Agim Baçi shpjeguan si e shohin ata fondacionin dhe pse kanë kaq shumë besim te “Fundjavë Ndryshe”.
Dy vite janë pak por ndryshimi u bë, tani të gjithë flasin për “Fundjavë Ndryshe”. Më 27 tetor 2015, Fundjavë Ndryshe lindi mes varfërisë. Si një dëshirë për të ndihmuar njerëzit në nevojë. Lindi ekzaktësisht si dëshira e një të riu vetëm 21 vjeç, ku mes mundësive për të jetuar në dimensionin e shndritshëm të aktualitetit tonë, ai zgjedh të mbështesë grupin shoqëror më të dobët të vendit.
Kujtojmë se nisma e bamirësisë “Fundjavë Ndryshe” është shpallur personazhi i vitit 2017 nga televizioni më i madh kombëtar “Top Channel”. Votuesit e sondazhit zgjodhën midis shumë personazheve nismën e bamirësisë “Fundjavë Ndryshe”, e cila u është gjendur pranë shumë familjeve në nevojë.
“Fundjave Ndryshe” vijon bashkëpunimin dhe marrëveshjet me bizneset dhe grupet e interesit në mbështetje të familjeve në nevojë.
