Situatë të rëndë po kalon edhe Maqedonia, pas reshjeve të shiut në dy ditët e fundit. Vërshimi i ujërave ka shkaktuar përmbytje dhe probleme tek banorët e Komunës së Strugës. Fshati Teferiç, ka hasur probleme të mëdha, pasi janë përmbytur sipërfaqe të mëdha tokash të mbjella me kultura bujqësore.
Situatë e rëndë raportohet edhe në disa vende të tjera të Maqedonisë për shkak të reshjeve të rëna me intensitet të lartë. Nga vërshimi rrezikohen edhe shtëpitë e fshatit.Banorët shprehen të revoltuar dhe fajin e adresojnë tek strukrurat e pushtetit vendor, pasi sipas tyre, përmbytjet janë shkaktuar nga mospastrimi i kanaleve prej më shumë se 9 vitesh.
“Në qytet, gjendja më kritike është në lagjen Plitishtë. Rrugë të tëra janë nën ujë, ndërsa qytetarët ankohen se edhe pusetat janë mbushur me ujë, prandaj nuk mund të përballojnë sasinë e shiut që ka rënë dy ditët e fundit në Strugë. Të veshur me çizme, shprehen se tërë natën kanë qëndruar zgjuar dhe me pompa kanë tentuar të thithin ujin nga shtëpitë”-shkruan Alsat.
“Kemi mjaft dëme. Është alarmuar në të gjitha institucionet kompetente. Askush nuk ndërmerr asgjë. Në rrugën kryesore vetëm erdhi policia, i vendosi barikadat dhe tha se prej këtu të mos qarkullohet meqë kishte rreth 70 centimetra ujë. Te fqinjët është shkaktuar shumë dëm. Kemi dëmtime të tavolinave, karrigeve, krevateve- thotë një banor i Strugës
