Vijojnë replikat në distancë ndërmjet kryetarit të Bashkisë së Tepelenës, Tërmet Peçi, dhe deputetit demokrat Tritan Shehu, e ndërsa ‘Enver Hoxha’ është kthyer në një ‘mollë’ sherri. Pas apelit publik nga Shehu, që Rama të shkarkonte Peçin, ku i fundit ia ktheu me menefregizëm. E ndërsa lidhur me mungesën e tij në festë, ai thotë se ftesën e kishte marrë shumë vonë.
Demokrati sqaroi se ftesa i kishte ardhur në një kohë kur kishte planifikuar një vizitë zyrtare bashkë me Bashën në Maqedoni. “Ngjarja që ndodhi në darkën zyrtare të djeshme është shumë e rëndë, pasi kryetari i bashkisë i thur lavde diktatorit Hoxha, atij që është shkaktar dhe përgjegjës për një diktaturë gjakatare për varfërimin e popullit, shkatërrimin e vendit, që e pësoi edhe populli liridashës, si i Tepelenës”, tha ai në një prononcim për ‘BalkanWeb’.
“Dje u tradhtuan idealet e atyre që luftuan për pushtet, pavarësisht se si pjesëtarët e saj në atë periudhë e imagjinon të ardhmen e Shqipërisë. Ky është gjest i dënueshëm politikisht e moralisht, pasi Kuvendi i Shqipërisë ka miratuar dekomunizmim e vendit përmes rezolutave të KE për këtë çështje. Pra unë mendoj se Rama duhet të shkarkojë kryetarin e Bashkisë së Tepelenës, për shkelje ligji, për ofendim të kalvarit të madh dhe të egër që pësoi populli i Tepelenës, për ofendim të ish-të përndjekurve politikë.
Në lidhje me atë që thotë kryetari i Bashkisë për mospjesëmarrjen time dje, unë dua të them se ftesën e mora në më pak se 24 orë nga festimi, në një kohë që unë kisha parashikuar që do të shoqëroja z. Basha në Maqedoni. Ishte një festë e dërguar thjesht sa për të larë gojën dhe aspak në përputhje me etikën që kryetari i Bashkisë duhet të njoftojë me kohë deputetin. I uroj popullit të Tepelenës për ditën e çlirimit dhe uroj që të shpëtojnë nga bëmat e këtij Tërmeti, i cili vetëm po prish imazhin e asaj bashkie vlerash dhe virtytesh”, tha Tritan Shehu.
https://tiranatoday.com/godet-termet-peci-i-kendon-enver-hoxhes-terbohet-deputeti-demokrat-paralajmeron-ramen-video/
