Ish-kryetari i Bashkisë Vlorë dhe njëkohësisht ish-presidenti i Flamurtarit vazhdon të jetë aktiv edhe sot në çështjet e ekipit vlonjat. Edmond Liçaj, ish-trajneri i Flamurtarit, në një intervistë për “Panorama Sport” u shpreh se ish-presidenti Gjika ndërhynte në punët e ekipit në kohën kur Liçaj ishte trajner. Ndërkohë, Shpëtim Gjika ka replikuar ashpër ndaj deklaratës së tij, përmes një postimi në profilin e tij në “Facebook”. Ja postimi i Gjikës:
Përgjigje e detyruar për ish trajnerin e Flamurtarit, Edmond Licaj! Duke u bazuar në dokumenta,(shih fotot), i kërkoj ndjesë vehtes time, që i kam dhënë mundësinë njerëzve të tillë të punojnë te Flamurtari! Ky zotëria që ankohet për merkaton, para se të merrte drejtimin e ekipit, ka qenë drejtor teknik! Që dmth ka qenë pjesë e vendimmarrjes! Ky zotëria që ankohet sot, në kohën kur mori ekipin, vetëm më ka falenderuar dhe ka qenë shumë i kënaqur me mua dhe ekipin (lexo ne foto)!
Ky zotëria që ankohet për merkaton, të vetmen kërkesë që bëri për merkaton, ishte te merrte në ekip djalin e tij, i cili sapo kthehej nga një ndërhyrje kirurgjikale ne Rusi për sytë sepse rrezikonte te humbte shikimin! Operacion që ka kushtuar 5 mijë euro dhe është paguar nga unë(dëshmitar është Edi, i ati i Ardit dhe Lenci Shehaj)!
Ky zotëria që ankohet për mungesën e akademisë dhe të lojtarëve vlonjatë në ekip, gënjen pa pikë turpi, sepse në atë kohë ekipi i Flamurtarit kishte të pakten 9 lojtarë në formacion nga akademia vlonjate!
Ky zotëria që për të justifikuar pa aftësinë e tij, nxjerr arsye te cilësia e ekipit, dua ti them vetëm që, kur u largua ky trajner në shkurt 2009 për mungesë rezultatesh, trajneri Eqerem Memushi, me po të njëjtin kontigjent, fitoi Kupën e Shqipërisë në maj të po atij viti! Që është mosmirënjohës ky zotëria e dija, por që të ishte dhe gënjeshtar sot e mësova!
