Përpos gurëve dhe dërrasave, banorët e “5 Majit” kanë qëlluar në drejtim të efektivëve edhe me shishe benzine që i kanë zjarrin. Deputeti i Partisë Demokratike Alfred Rushaj, i ka kërkuar kryebashkiakut të Tiranës që të bisedojë me banorët.
“Jemi munduar të bëjmë çdo gjë procedurialisht. Që para një viti janë bërë kallëzime penale. Kemi bërë kërkesë kryetarit të Bashkisë, që të ulet dhe të plotësojë kërkesat e tyre. Çfarë janë këto njerëz që veprojnë kështu? Pse nuk pritet përgjigjja e institucioneve?”, tha Rushaj.
Banorët e “5 Majit” po protestojnë për të mbrojtur shtëpitë e tyre, të cilat priten të shemben nga IMT, në kuadër të projektit të rindërtimit dhe rikualifikimit urban. Banorët në shenjë rezistence, kanë tentuar që të pengojnë policinë që të ndërhyjë, duke refuzuar që të largohen. Ata janë përplasur me policinë, ku kanë qëlluar me shkopinj e gurë si dhe kanë hedhur shashka në drejtim të efektivëve.
