Renditja e FIFA-s/Shqipëria përmirësohet edhe kur humb, Kosova…

Shqipëria ka fituar dy pozicione në renditjen e FIFA-s, duke u ngjitur nga vendi i 58-ë në të 56-in. Është e habitshme pasi kuqezinjtë e Panuccit janë mposhtur me rezultatin 1-0 në miqësoren e muajit Mars me Norvegjinë, por kjo rritje ka ardhur si humbje e 5 vendeve nga Japonia dhe 10 vende që humbi Bolivia.

Ndërsa Kosova ka ecur me hap galopant, pas dy fitorene, 1-0 ndaj Mozambikut dhe 2-0 ndaj Burkin Fason. Një debutim perfekt i trajnerit zviceran, Challandes, ku “Dardanët” kanë fituar plot 24 pozicione në renditjen e përgjithshme, duke shkuar nga vendi i 176-të tek i 152-ti.

Pak ndryshime në 10-shen më të mirë. Portugalia dhe Argjentina, respektivisht në vendin e 4-t dhe të 5-të, humbasin nga një vend, ndërsa Belgjika fiton dy pozicione dhe ngjitet e 3-ta. Spanja rrëshqet në vendin e 8-të, ndërsa Franca dhe Zvicra fitojnë nga dy pozicione (7 dhe 6). Humbet 4 vende edhe Polonia, që mbyll top-10-shen, ndërsa mbeten në vendin e parë dhe të dytë Gjermania dhe Brazili.