Erion Veliaj i ka dhënë të gjitha provat se ai e do televizionin. Punët e tij në terren janë të gërshetuara me publikun, por më me rëndësi është ajo me operatorët, të cilët e ndjekin hap pas hapi, ku ai hedh këmbët.
Marrja e një lopate për të mbjellë një pemë, apo veshja sport për të treguar se diçka po bëhet për mobilizimin dhe ndarjen e korsive për biçikletat, lyerja e një shkolle apo kopshti, janë ndër prioritetet e kryebashkiakut.
Por më shumë se kjo dëshirë për të kontribuar në këtë shoqëri, është ajo e lëvdatave, e dëshmisë se unë ndodhem atje, për të bërë diçka të mirë! Interesi i shtuar ndaj mediave nuk ka rënë në vesh të shurdhër, pasi ai e pranoi vetë në një intervistë të fundit në “Top Channel”, në programin “Pushime on Top”, se ai ka shumë intesitet pune, dhe madje nuk kursehet për të treguar se çfarë po bëhet.
Duket se kryetari i Bashkisë së Tiranës po thyen rekordin me propagandën. Në harkun kohor të katër ditëve, Veliaj është shfaqur në tre intervista, në tre televizione të ndryshime. Me një llogaritje të thjeshtë, kryebashkiaku po shfrytëzon ‘thatësirën’ e gushtit sa i takon lajmeve, për të marrë sa më shumë kohë televizive.
Në datën 1 gusht, në “Top Channel”, në programin “Pushime on Top”, intervista me Veliajn në Jal ishte afro 20 minuta. Në mbrëmje, Veliaj u shfaq në “Vizon Plus”, në një intervistë për afro 30 minuta, ndërsa ditën e djeshme ishte në ekranin e “Abc News”, në një intervistë afro 20 minutëshe.
Brenda katër ditëve, kryebashkiaku i Tiranës është shfaqur në tre ekrane, pa shtuar këtu kronikat e përditshme që shpërndahen nga Bashkia e Tiranës dhe që transmetohen në të gjitha televizionet.
