Ish-ministri i Jashtëm Ditmir Bushati ka reaguar pas rekomandimit pozitiv të KE-së për çeljen e negociatave për Shqipërinë dhe Maqedoninë e Veriut.
Në një postim në rrjetet sociale, ish-ministri e konsideron këtë një lajm të shkëlqyer, ndërsa më tej vijon se “miratimi i këtij rekomandimi nga vendet anëtare të BE do ishte hapi i radhës që do siguronte besueshmërinë e procesit të zgjerimit.”
“Një lajm i shkëlqyer për Shqipërinë! Komisioni Europian përsërit rekomandimin drejtuar Vendeve Anëtare të Bashkimit Europian për nisjen e bisedimeve të anëtarësimit me Shqipërinë bazuar në progresin e arritur dhe kalendarin e miratuar unanimisht në qershor të vitit 2018 nga Vendet Anëtare.
Miratimi i rekomandimit nga Vendet Anëtare dhe përcaktimi i datës për nisjen e bisedimeve të anëtarësimit janë hapi i radhës që do të siguronin besueshmërinë e procesit të zgjerimit”, shkruan Bushati.
