Kryeministri Edi Rama ka paralajmëruar të gjithë qytetarët, se duke nisur nga data 1 shkurt do të dënohen për lidhjet e paligjshme të ujit të pijshëm. Me anë të një postimi në “Facebook” Rama shkruan se në radhë të parë duhet vendosur ligjshmëria, pastaj duhen rritur edhe investimet.
Kujtojmë se një ditë më parë Rama njoftoi se të gjithë puset industrial dhe ata që përdoren nga bizneset duhet të vendosnin menjëherë sahat për të paguar ujin që ata përdorin.
Postimi i plotë i Ramës në Facebook
“Kush ende nuk ka bërë lidhjen e ligjshme me ujësjellësin të nxitojë deri në 31 janar. Të ligjërojë marrëdhënien me ndërmarrjen e bashkisë përkatëse pa asnjë penalitet ligjor, ashtu siç kanë e po bëjnë me mijëra konsumatorë familjarë e biznese.
Nga 1 shkurti çdo lidhje e paligjshme do të ndëshkohet sipas ligjit! Uji i pijshëm është pasuri e përbashkët, boll është vjedhur e shpërdoruar 27 vjet! Shumica nuk mund të paguajë më edhe për pakicën dhe shërbimi me ujë 24 orë në çdo shtëpi e biznes, arrihet duke vendosur në radhë të parë ligjshmërinë, pastaj duke rritur edhe investimet e jo borxhet falë kontributit të secilit sipas sasisë që konsumon. #Shqipëriaqëduam është aspiratë dhe detyrim për çdo shqiptar”, shkruan Rama në ‘Facebook’.
