Në mbledhjen e sotme të Komisionit të Posaçëm për Reformën Zgjedhore është shqyrtuar drafti i reformës me mendime të paraqitura nga ekspertët.
Rudina Hajdari, në cilësinë e bashkëkryetares të Komisionit, tha se debatet janë përqëndruar te amendimet lidhur me administratën zgjedhore. Ajo theksoi se do të kërkohet ndryshimi i ligjit për nëpunësin civil.
“Është një pikënisje e duhur por nuk kemi arritur një konsensus lidhur me amendimet që janë bërë për administratën zgjedhore. Pofesioni i komisionerëve në të gjitha nivelet është tejet i rëndësishëm sepse nuk do të jetë thjesht një përzgjedhje e nëpunësve civilë gjë që kërkon që paralelisht statusi për nëpunësin civil të ndryshohet sepse në të kundërt kjo skemë që kanë prezantuar ekspertët nuk mund të funksionojë. Kemi akoma shumë punë për të bërë siç është ndryshimi i ligjit për nëpunësin civil.
Një pikë tjetër është përgjegjshmëria që këta individë do të kenë në momentin që do të zgjidhen si anëtarë të KQZ. Një risi tjetër është KAS. Kërkohet që të kenë përgjegjshmëri shumë të lartë. Njerëz jashtë strukturës së shërbimit civil mund të aplikojnë.Kyçi është që do të kalojnë në Kuvend me 2/3. Kjo ka për synim të jetë një formulë për 30 vitet e ardhshme”, deklsroi deputetja.
Hajdari tha se drafti i parë kishte mangësi në mënyrën si ishin implementuar rekomandimet e OSBE-ODIHR.
Hajdari nënvizoi se qëllimi i opozitës është ndryshimi i sistemit. Nga ana tjetër, Aleanca e Grave Deputete ka kërkuar më shumë përfaqësim në Kuvend.
