Ndërkohë që zien debati mes artisteve dhe Ministrisë së Kulturës për godinën e re të Teatrit Kombëtar dhe jo vetëm, por ndërkohë artistët po presin për bisedime ministren Kumbaro, sot aktori i njohur Bujar Asqeriu ka shpërthyer me një deklaratë të fortë.
“Artisti më i mirë merr një rrogë sa nëpunësja më e ulët e shtetit. Zoti i paftë ata që vjedhin, ia kam lëne Zotit”- ka thënë ai, duke shtuar se “nga jeta ikën artistët më të njohur dhe askush nuk e çau trapin për ta”.
Asqeriu në deklaratën e bërë për mediat jashtë ambienteve te teatrit, kujtoi të madhin Bujar Lako, që jetonte në një dhomë 50 metra katror dhe askush nuk u kujtua.
“Ky vend qeveriset nga hajdute, që vjedhin edhe 100 lekëshin e dosjeve dhe stilolapsave dhe ne na hedhin një kocke dhe tallen me ne”- tha ai.
“Refleksionet nga qeveria e ministria duket që janë të vakëta mos me thënë të ftohta. Këtu nuk e kuptojnë në thelb çfarë është artisti. Ky është vlerësimi që i bën shteti shqiptar këtyre artistëve. Neve na fusin në vrimën e miut, atje në hidrocentral, se hajdutët nuk na lënë lekë”, thotë aktori Bujar Asqeriu.
“Asnjë nuk e di se sa është fondi publik i Teatrit. Transparenca është zero. Zgjedhja e lidershipit të institucioneve kombëtare kulturore duhet të ndryshojë. Rektori i Universitetit zgjidhet në mënyrë demokratike, politika nuk ka kontroll mbi universitetet po ka mbi teatrin, ky është absurd i madh. Do bëjmë kërkesë në Parlament për amendament ku të thuhet që lidershipi nuk emërohet por zgjidhet nga komunitetit”, tha Stefan Çapaliku.
Ndërsa regjisori Altin Basha thotë se artistët nuk lejohen të hyjnë në sallën e teatrit për të mbajtur deklaratë. “Artistët nuk lejohen të hyjnë në sallën e teatrit për të mbajtur një deklaratë. Shenjë skandaloze. Administrata e teatrit që përfaqëson ministrinë e Kulturës nuk ka dëshirë për dialog. Na janë bashkuar kolegë nga cirku, nga TKOB, nga QKK gjëja që nuk është më e vogël. Janë 4 mijë firmëtarë të peticionit online. Kumbaro ka kërkuar një përfaqësi për takim në ministrinë e Kulturës të mërkurën në orën 4. Ditën e mërkurë në orën 4 e presim këtu në teatër ministren”, thotë Basha.
