Pas alarmit për anijen tregtare shqiptare të ndaluar nga marina ushtarake e Libisë, ka reaguar ministria e Jashtme. Kjo e fundit njofton se po përpiqet për të bërë të mundur kthimin marinarëve, ndërsa shton se ata s’kanë ndonjë problem.
“MEPJ ka marrë të gjitha kontaktet e mundshme dhe kemi bërë intervenimet tek libianët. Po e ndjekim intensivisht situatën. Po kërkojmë e përpiqemi për kthimin e tyre. Marinarët ndodhen në anije dhe jemi siguruar që s’kanë asnjë problem shqetësues”, njofton ministria.
Anija shqiptare “Envi 1” ishte nisur nga porti i Zuaras, 110 kilometra larg Tripolit me destinacion Maltën, por u ndalua nga marina ushtarake e Libisë për transport të paligjshëm mallrash.
Autoritetet ushtarake bregdetare të Libisë detyruan anijen të ankorohet pranë një tjetër porti, atij të Zauya-s, një port kryesisht karburantesh, që ndodhet 50 kilometra në perëndim të Tripolit.
Në përbërje të ekuipazhit prej 8 anëtarësh ndodhen edhe 5 marinarët shqiptarë, të cilët janë Maliq Bushati, Avni Buzi, Artur Selimaj, Xhodet Çelaj dhe Jurgen Balla.
