Pas reagimit të disa ambasadave të huaja të akredituara në Tiranë, të cilat bën apel për mbrojtje të pronës publike, ka ardhur edhe reagimi i gazetarit dhe analistit Neritan Sejaminit.
Ky i fundit, e cilëson të turpshëm reagimin e diplomatëve të huaj në vendin tonë, të cilët sipas tij, “bëjnë thirrje për mbrojtjen e pronës publike, pra të kërpudhës, dhe jo për mbrojtjen e lirisë, të drejtave të njeriut, demokracisë”.
“Është qesharake të shikosh nivelin e turpshëm ku kanë përfunduar perëndimorë në Tiranë: bëjnë thirrje për mbrojtjen e pronës publike, pra të kërpudhës, dhe jo për mbrojtjen e lirisë, të drejtave të njeriut, demokracisë; flasin për rrezikun që i vjen vendit nga prishja e kërpudhës, ndërkohë që heshtin prej vitesh, pa belbëzuar qoftë edhe një fjalë, për rrezikun që i vjen Shqipërisë, po edhe vendeve të tyre, nga kapja e shtetit prej krimit dhe korrupsionit marramendës.
Shqiptarët nuk duhet t’i marrin ata seriozisht, sikurse, për të keqen e tyre, morën seriozisht dy manipulatorët e vegjël Vlahutin dhe Lu. Shqiptarët duhet të marrin seriozisht veten e tyre, lirinë dhe dinjitetin e tyre, dhe të drejtën për të vendosur vetë se çfarë qeverie duan”, shkruan Sejamini në reagimin e tij.
