Kryetarja e Kuvendit, Lindita Nikolli, ka reaguar në një deklaratë për mediat në lidhje me letrën informuese nga ana e Autoritetit të Dosjeve, ku vihej në dijeni se politikani me inicialet I.M., figuron me dosje në aktivitetin e Sigurimit të Shtetit. Nikolla e cilësoi rastin tronditës, ndërsa kërkoi që Kuvendi të reagojë patjetër. Për këtë arsye ajo tha se ka thirrur kryetarët e grupeve dhe kryetarët e Komisionit të Sigurisë e të Komisionit të Ligjeve, ku i ka vënë në dijeni për letrën e Autoritetit.
“Dje Autoriteti për Informim mbi Dosjet e Ish-Sigurimit të Shtetit ka informuar publikun për rastin e një politikani me profil të lartë, me inicialet I.M, i cili ka rezultuar i përfshirë në aktivitetin e Sigurimit të Shtetit. Autoriteti i Dosjeve ka nisur gjithashtu një letër në drejtimin tim, ku më vë në dijeni të identitetit të këtij politikani me profil të lartë, dhe kërkon nga Kuvendi ndërhyrje të menjëhershme për adresimin e një pengese ligjore, që nuk ia mundëson Autoritetit veprimet e domosdoshme për rastin.
Rasti është tronditës dhe Kuvendi duhet të reagojë patjetër. Prandaj kam thirrur sot kryetarët e grupeve dhe kryetarët e Komisionit të Sigurisë dhe të Komisionit të Ligjeve, të cilët i kam informuar mbi letrën e Autoritetit, identitetin e politikanit me inicialet I.M, si edhe gatishmërinë time për ta mbledhur Kuvendin në çdo kohë që forcat politike do të kenë nevojë.
Dua ta falenderoj Autoritetin e Dosjeve për reagimin e drejtë, të pavarur dhe profesional, si edhe për kurajon në adresimin e këtij rasti, i cili ngre pyetje të rëndësishme për shoqërinë tonë dhe për forcat politike. Në respekt të ligjit dhe ndjeshmërisë së lartë të këtij rasti vërtetë tronditës, nuk mund të flas më shumë në këtë fazë”, tha Nikolla.
