Raportuesit për Shqipërinë në Këshillin e Europës, i kanë bërë thirrje forcave politike, të angazhohen seriozisht për reformën zgjedhore. Në një deklaratë për mediat, ata shprehen të shqetësuar për krizën. Sipas tyre, rruga për të dalë nga kriza është reforma zgjedhore gjithëpërfshirëse.
Në qëndrimin publik thuhet se bojkotimet dhe djegia e mandateve nuk duhet të kenë vend në një shoqëri demokratike. Mazhoranca duhet të angazhohet në dialog dhe konsultim të mirëfilltë me opozitën, për reformat e rëndësishme dhe sfidat politike me të cilat po përballet vendi.
Pas një vizite në Tiranë, bashkëraportuesit e Asamblesë Parlamentare të Këshillit të Evropës (PACE), për monitorimin e Shqipërisë, Andrej Hunko (Gjermani, UEL) dhe Joseph O’Reilly (Irlandë, EPP / CD), u kanë bërë thirrje të gjitha forcave politike në Shqipëri, të tregojnë vullnet politik për të zgjidhur krizën politike që ka pllakosur vendin.
“Ne ritheksojmë qëndrimin tonë se Parlamenti është forumi për dialog dhe diskutim politik. Dhe për këtë arsye, bojkotimet dhe djegia e mandateve nuk duhet të kenë vend në një shoqëri demokratike. Në të njëjtën kohë, mazhoranca në pushtet duhet të angazhohet në dialog dhe konsultim të mirëfilltë me opozitën për reformat e rëndësishme dhe sfidat politike me të cilat po përballet vendi”, theksojnë dy bashkëraportuesit.
