Reporteri për Shqipërinë në PE, David Lega i ka bërë thirrje kryeministrit Rama që të anulojë paketën ligjore për median. Kjo e fundit u miratua nga Kuvendi në dhjetor të vitit të shkuar.
Duke iu referuar raportit të Reporterëve pa Kufi ku Shqipëria renditet e 84-ta në 180 vende të botës, Lega thotë se liria e medias në vend është përkeqësuar.
“Kufizimi i lirisë së shprehjes, informimit e medias është i papranueshëm në një vend që aspiron për anëtar të Bashkimit Evropian. Ligjet (e pezulluara) për median do e përkeqësojnë më tej lirinë e medias në Shqipëri”, deklaron Lega.
Presidenti Ilir Meta i ktheu ligjet në Kuvend, ndërsa Asambleja Parlamentare e Këshillit të Evropës kërkoi opinionin e Komisionit të Venecias në lidhje me këtë situatë.
Kreu i qeverisë theksoi se do të presë deri sa të dalë opinioni i Venecias, përpara se të votojë dekretin.
