Kreu i Partisë Agrare Ambientaliste, Agron Duka thotë se Bashës dhe Kryemadhit i leverdis të jenë bashkë dhe të bashkëpunojnë edhe me partitë e vogla. I ftuar në rubrikën “Opinion” në “News24”, Duka deklaroi se raporti PD-LSI nuk është një marrëdhënie programore. Ai sqaroi se LSI është një parti që vjen nga e majta, por ka të njëjtin qellim me ne rrëzimin e qeverisë Rama.
“Raporti PD-LSI nuk është një marrëdhënie programore. LSI është një parti që vjen nga e majta, por duke qenë se kanë po një qëllim, rrëzimin e qeverisë Rama, i leverdis të dyve që të jenë bashkë dhe të bashkëpunojnë edhe me partitë e vogla, apo edhe me anëtarë të shoqërisë civile për të arritur atë që dëshirojnë. Pra nuk mendoj se bëhet fjalë për një rokadë, por për rrëzimin e qeverisë Rama”, u shpreh Duka.
Duka thotë se baza e protestës së opozitës është situata e vështirë ekonomike në vend dhe zgjedhjet e kaluara parlamentare, të cilët sipas tyre u blenë. Ai paralajmëron se protesta e paralajmëruar e opozitës më 27 janar, sipas tij, do të jetë e përmasave të mëdha.
“Mendoj se protesta do të jetë e përmasave të mëdha. Opozita do të mundohet të sjellë sa më shumë njerëz në protestë, jo të rretheve por ata që janë më afër Tiranës. Edhe njerëzit që janë pranë Partisë Agrare Ambientaliste kanë arsye për të protestuar, pasi problemet e bujqësisë dhe blegtorisë janë ende të pazgjidhura. Shumë banorë po detyrohen të braktisin fshatin për mungesë shprese dhe perspektive. Ka shumë arsye që i shtyjnë njerëzit që të protestojnë”, deklaroi Duka.
