Keru i Partisë Republikane, Fatmir Mediu ka deklaruar se faktorët që ndikuan në rezultatin e zgjedhjeve të 25 qershori janë denoncuar dhe dihen publikisht.
Sipas Mediut, edhe në raportin e OSBE/ODIHR është pasqyruar shqetësimi për blerjen e votës dhe presionit në zgjedhjet që lamë pas.
Problemi më i madh për Mediun është se shqiptarët po kalojmë në korruptimin e shoqërisë.
“Kanë qenë fenomene shoqëruese që njiheshin gjatë periudhës së fushatës, rreziku nga krimi, droga, tentativa për blerjet e votës. Raporti i OSBE/ODIHR e ka përmendur faktin e blerjes së votës. Shkonin nga 100-200 mijë lekë të vjetra. Nëse rastet janë denoncuar do të thotë se kjo nuk është një fenomen i izoluar, por i pranishëm. Ne po kalojmë në korruptimin e shoqërisë, duke i thënë se nuk ka vlerë zgjedhja e tyre, por që zgjedhja e tyre do të blihet. Rama bëri një fushatë qesharake pa thelb e pa përmbajtje. Kryeministri e ka raportin me qytetarët, jo me koalicionin apo të tjerët”, u shpreh Fatmir Mediu në rubrikën “opinion”.
