Diplomati dhe ish-ambasadori i Shqipërisë në Greqi, Bashkim Zeneli, ka vlerësuar raportet me Greqinë e ndërsa është i mendimit se duhet të jemi me njëri-tjetrin. Në studion e lajmeve të “Ora News”, ai tha se Greqia e ka mbështetur Shqipërinë në rrugën integruese. Me theks të veçantë në marrëdhëniet e mira, Bashkim Zeneli kërkoi kohë, pasi për këtë proces duhet punë, vullnet polik e frymë evropiane.
“Greqia mbetet një fqinj shumë i mirë i Shqipërisë, një mik i mirë i Shqipërisë. Ne jemi popuj miq. Problemi është që ne nuk duhet të jemi pranë njëri-tjetrit nga pikëpamja gjeografike, apo nga pikëpamja e fqinjësisë.
Ne duhet të jemi me njëri-tjetrin. Kjo ka rëndësi sepse Greqia e ka mbështetur Shqipërinë në rrugën integruese. Duhet të dimë jo thjesht të vlerësojmë këtë fakt, por të punojmë përditë, sepse marrëdhëniet e mira duan kohë, duan punë, duan vullnet politik, duan frymë evropiane që të ndërtohen. Për tu prishur mjafton një deklaratë ose nga ne, ose andej matanë kufirit”, deklaroi ai.
Për të kapërcyer pengesat mes dy vendeve, diplomati Zeneli tha se duhet vullnet politik nga të dyja palët. Për të zgjidhur këtë ngërç, duhet t’i referohemi të kaluarës për ti zgjidhur problemet, por me një synim evropian.
“Unë nuk mendoj se jemi në një moment që të ulemi dhe të diskutojmë 20 probleme, dhe të bëjmë një marrëveshje për 20 probleme. Kjo nuk është as politikë diplomatike, dhe diplomaci politike. Ne duhet t’i shikojmë problemet një e nga një. Mbi të gjitha duhet frymë dhe vullnet.
Mos ecim përpara duke kthyer kokën prapa, mos ti referohemi vetëm së kaluarës. T’i referohemi të kaluarës për ti zgjidhur problemet, por t’i referohemi me një synim evropian. Gjermania i ka zgjidhur këto probleme me Francën, Austrinë, me Poloninë, Holandën, dhe i kanë zgjidhur me një frymë mirëkuptimi.
Popujt presin nga qeveritë, ata duan bashkëjetesë, harmoni. Popujt nuk kanë ngatërresë, ngatërresat i nxit politika me segmente të caktuara në të dyja vendet”, përfundoi ai.
