Ka përfunduar mbledhja e kryesisë së PS-së, ndërsa vetë Rama ka udhëtuar menjëherë drejt qytetit të Fierit. Kjo mbledhje vjen menjëherë pas Asamblesë Kombëtare të PS tri ditë më parë, ku u prezantua puna e bërë në 100 ditët e para të qeverisjes, ndërsa si temë kryesore ishin edhe projektet që do të zhvillohen përgjatë vitit 2018.
Në mbledhjen e kryesisë është diskutuar për vendimet e Asamblesë Kombëtare të PS, e cila u mblodh të shtunën e 6 janarit. Gjithashtu, është diskutuar për çështjet organizative të partisë, si dhe përgatitjet për zgjedhjet e 2019.
Gjatë mbledhjes së Kryesisë është vendosur që në 61 bashki të trajnohet nga një person për përdorimin e portalit të bashkëqeverisjes “Shqipëriaqë duam.al”. ndërkohë, degëve të partisë iu është kërkuar të anëtarësojnë deri në tetor në portal anëtarët e PS, pasi përdorimi i këtij portali nuk është aq i lehtë, ndërsa qytetarët e thjeshtë kanë shumë probleme.
Mësohet se Rama iu ka thënë të pranishmëve që të fillojë puna për zgjedhjet në parti, pasi ka kaluar afati.
“Të punohet me zgjedhjet në parti. Ka kaluar afati. Të bëhen zgjedhjet për kryetar, ku ende nuk është bërë”, mësohet të ketë thënë Rama në mbledhje-shkruan shqiptarja.com
Asambleja e ardhshme e PS do të fokusohet në pushtetin vendor, ku do të raportojnë kryetarët e bashkive, ndërsa në muajit Prill dhe Mars pritet të ketë sondazhe në të gjitha bashkitë për sa i përket kushteve dhe gjendjes ku jetojnë shqiptarët, si një qasje identifikuese për problematikat.
