Pakti Basha-Rama gjithmonë ka marrë vemendjen e duhur. Dhe sot e kësaj dite, kritikët nga ana e PD-së ende kanë rezerva në lidhje me këtë pakt.
Në këtë formë, ndërkombëtarët arritën konsensusin e shumëkërkuar për Vetingun.
Ndonëse klasa politike ndodhet me pushime, e kjo reflektohet qartë edhe nga fotot e videot të cilat i kanë bërë publike në rrjetet sociale, nga ana tjetër diçka po vlon sa i takon marrëveshjeve të fshehta.
Kjo është një periudhë ‘heshtje politike’, por qytetarët janë ata të cilët ‘manipulohen’ më lehtë.
Burime pranë 360grade.al, informojnë se mbi tryezën e kryeministrit Rama qëndron një skenar “B”, për një “marrëveshje të madhe me opozitën”, që lidhet me krijimin e një qeverie teknike ekspertësh, justifikuar me datën e hapjes së negociatave me BE, që është teorikisht vitin e ardhshëm.
Në krye të “teknikëve”, ashtu si në eksperiencën e qershorit 2017, do të jetë përsëri i njëjti kryeministër, por përflitet një mbështetje e gjerë edhe në Kuvend, ku deputetët do të “veshin fanellat e kombëtares”, për gjoja qëllimin e madh europian.
Ndërsa “drejtësisë së reformuar”, do ti ndalohet hapja e çështjeve të reja, në lidhje me politikanët dhe familjarët e tyre.
Ideatori i kësaj “formule”, mendohet se është një biznesmen i njohur shqiptar dhe disa politikanë, që vijnë nga fusha e biznesit. Kjo mbetet në kuadrin e zërave që qarkullojnë, e ndërsa orët e ardhshme janë ato që do të hedhin dritë për çfarë po kurdiset.
