Protesta ka agravuar në përplasje fizike mes policisë dhe banorëve për disa momente, teksa në foltore është ngjitur kryeministri Rama. Lidhur me vlerën 40 milionë euro që duhet për ndërtimin e një segmenti rrugor 2.2 km, Rama bëri një krahasim mes këtij standarti, dhe atij të qeverisë Berisha. Ai tha ndër të tjera se do të ndërtojnë rrugë të shpejta dhe të sigurta. Përmes batutave, Rama u shpreh se këto rrugë janë si pantallonat e teritalit.
“Rrugët e Shqipërisë, këto rrugët e Shqipëria po ndryshon… Levan- Tepelenë, kategoria C, Levan- Vlorë, kategoria B, Tiranë – Elbasan, kategoria 2.
Rruga Kombit, kategoria C, Rubik- Rrëshen Kategoria C, Kalimash- Morinë, kategoria C.
Tani po marr vetem një shëmbull: Thumanë- Kashar është një rrugë me gjatësi 21 km. Por ka një kosto e cila e përfshirë dhe mirëmbajtja, shkon 28 miliard. Por shikoni çfarë ka brenda.
Nuk janë 21 km me tegel teritali. Ka 77 mbikalime dhe nënkalime, ka sistem drenimi, ka 12 ura me gjatësi 4 km, ka 3 nyje lidhëse, ka 34 rrugë sekondare, ka 100 mijë metra pilota, barriera akustike.
Tani ça do të thotë kjo? Është zemra lidhëse e gjithë trafikut në Tiranë. Ne duam të bëjmë rrugë europiane, ku njeriu ka rrugën e vetë, makina ka rrugën e vetë. Në rrugët që bënë këta, je si në një korridor, me restorante, pishina, magazina. Aty s’e merr vesh të pari, të dytin dhe urdhëro aksidentet. Ne do ndërtojmë rrugë të shpejta e të sigurta.
Këto rrugë janë si pantallona teritali, është njësoj si të marrësh vithet e mia, kërcinjtë e Erion Braçes dhe gjunjët e… zgjidhen vetë se të kujt, e t’i thuash dikujt tjetër vishe tani”, tha Rama.
