Kryeministri Edi Rama ka paralajmëruar nisjen e një reforme rrënjësore për furnizimin me ujë në mbarë vendin.
Kreu i qeverisë pranoi problemin e madh që hasin sot shqiptarët sa i takon furnizimit me ujë, duke e quajtur këtë madje një “turp të qeverisë”.
Po ashtu, Rama u dha një afat kohor prej 90 ditësh të gjithë qytetarëve që të shkëpusin lidhjet e paligjshme, ndërsa shtoi se më 1 shkurt do të procedohen penalisht ata qytetarë që furnizohen me ujë me lidhje të paligjshme, duke rrezikuar masa shumë të rënda.
FJALA E RAMËS:
Kemi prapambetje shumë të gjatë në çështjen e ujit. Ankesat përbëjnë një shqetësim parësor. Sot jemi dëshmi e gjallë e të vërtetës së thjeshtë që mes vendeve që zhvillohen dhe atyre që nuk zhvillohen,
Jemi vendi i dytë më i pasur në Evropë me burime ujore dhe kur vjen puna s’kemi ujë.
Nëse e shohim ujin si bazë për jetën, shqiptarët mbijetojnë. Uji vjen në rubinet4-5 orë, nëpër fshatra vetëm një orë në ditë. E papranueshme të shohim dëshminë e kësaj prapambetjeje shumë të gjatë.
Për 27 vjet nuk ka arritur të zgjidhë një problem kaq flagrant, ku mjafton të hedhësh sytë në tarraca për të kuptuar se ku jemi.
Gjatë 4 viteve të fundit është shpenzuar afro 400 milion euro për të ndërtuar ujësjellës të rinj, megjithatë në çdo bashki situata është ekonomikisht e papranueshme.
Është një situatë që nuk ka si bëhet më keq. Vetëm një reformë rrënjësore, me një vendosmëri të hekurt, i ngjashëm me atë të energjisë elektrike, mund të na japë zgjidhjen për të dalë nga ky sistem i falimentuar.
Kemi kaluar të gjitha fazat. Kemi ndërtuar një plan operacional dhe duam që së bashku t’i përvishemi një pune kolosale ditë për ditë për të dalë nga ky pozicion turpërues për vendin në mbarë territorin e Shqipërisë. Ata që furnizohen me ujë në mënyrë të paligjshme, kanë 90 ditë kohë ta shkëpusin atë. Vjedhja e ujit dënohet nga kodi penal, nuk do e nisim me ndëshkime. E shikojmë të udhës që t’i japim kohë të gjitha konsumatorëve të ujit që të vetrregullohen.
Ne do të fillojmë menjëherë prerjen e lidhjeve të paligjshme, kjo nuk do të shoqërohet me penalizime./Tirana Today
