Kryeministri Edi Rama ka lëshuar sërish sot një ultimatum për median. Pas ditës së djeshme ku bëri thirrje që të hiqej çdo reklamë e basteve nga mediat, ai kërkon sot të njëjtën gjë.
Megjithatë, Rama është treguar më i ashpër, teksa kjo “kërkesë” është bërë në formën e një ultimatumi.
Në një postim në Twitter, kryeministri shkruan se kazinotë elektronike do të dalin jashtë ligjit më 31 dhjetor. Duke iu referuar reklamimit të tyre, Rama shkruan se është i jashtëligjshëm.
“Portalet që kanë ende reklama të tilla t’i heqin vetë se ndërkohë po punohet për mbylljen e tyre! Mos kemi llafe për lirinë e shtypit pastaj”, përmbyll kryeministri.
Postimi në Twitter:
Bastet e kazinote elektronike do të dalin jashtë ligjit në 31 dhjetor. Ama çdo reklamim i tyre në çdo lloj media, është i jashtëligjshëm. Portalet që kanë ende reklama të tilla t’i heqin vetë se ndërkohë po punohet për mbylljen e tyre! Mos kemi llafe për lirinë e shtypit pastaj?
— Edi Rama (@ediramaal) October 10, 2018
