Kryeministri Edi Rama shkruan se hyrja në fuqi e vendimit për ndalimin e qeseve plastike ka rezultuar pozitive. Kjo pasi sipas tij ka 50% më pak prodhim të tyre.
Përms një postimi në “Facebook”, Rama ka shpalosur edhe objektivin deri në qershor të vitit tjetër.
“Objektivi yne: Qershor 2020 afati final i nxjerrjes së qeseve plastike nga qarkullimi, pas daljes së Ligjit për Ndalimin e Hyrjes, Prodhimit dhe Përdorimit të Qeseve Plastike në Shqipëri”, thekson kryeministri.
Po ashtu, ai bën me dije se sfida e radhës do të jetë nxjerra nga përdorimi i shisheve dhe gotave plastike.
“Dhjetor 2020 afati final i nxjerrjes së shisheve, gotave e pjatave plastike nga qarkullimi, pas daljes së të njëjtit ligj.
Eshtë një objektiv shumë ambicioz, por Shqipëria Turistike që duam nuk mund të bashkëjetojë me qeset e me shishet plastike, prandaj do të vazhdojmë drejt për të realizuar objektivin, duke hyrë në një proces intensiv konsultimi publike” shton Rama.
Duke iu referuar vendimit të qeverisë, në treg lejohen vetëm qeset e riciklueshme të cilat u jepen blerësve kundrejt pagesës 5 deri në 10 lekë. Ndërsa në rastin e supermarketeve të mëdha e deri të tregtarët e vegjël që nuk përdorin qese të riciklueshme, gjobat do të variojnë nga 100 mijë deri në 150 mijë lekë.
