Në platformën e bashkëqeverisjes do të ketë edhe një dritare të veçantë për studentët, të cilët mund të pyesin për çdo paqartësi, ku do të marrin edhe përgjigje.
Lajmin e bëri të ditur kryeministri Rama gjatë një aktiviteti për ‘Bashkëqeverisjen me qytetarët’, ku tha se në platformë do të ketë një rubrikë “Jam student”.
“Pata një përmbytje të telefonit javën e kaluar nga studentët, por megjithëse e kemi çuar në sekretaritë e studentëve, përsëri ka shumë pyetje. Në platformën e bashkëqeverisjes do ketë një dritare të veçantë për studentët, të cilët mund të bëjnë pyetje dhe të marrin përgjigje për pakënaqësitë që kanë. Te Shqipëriaqëduam.al, aty do të shfaqet rubrika ‘Jamstudent’. Edhe Ministria e Arsimit do çelë në Facebook një dritare për të gjitha pyetjet që shqetësojnë studentët lidhur me tarifat apo për çdo paqartësi që kanë”, tha Rama.
Kujtojmë se një pjesë e studentëve vijojnë bojkotin dhe ngujimin në fakultete në shenjë proteste, ndërsa kërkojnë plotësimin e 9 kërkesave të tyre përfshirë edhe anulimin e ligjit për arsimin e lartë.
