Kryeministri Edi Rama, pas një takimi kokë më kokë me Përfaqësuesen e Lartë të BE-së për Politikën e Jashtme dhe Sigurinë, Federica Mogherini, në Bruksel, para darkës informale me Kryeministrat e Ballkanit Perëndimor, deklaroi për mediet se, BE duhet të jetë e përgatitur që pas zgjedhjeve të qershorit, politika një zëri do të kërkojë hapjen e negociatave.
“Unë i kam thënë shefes së diplomacisë europiane se, pas 25 qershorit duhet të jetë e përgatitur ajo dhe Komisioni Europian që qeveria dhe opozita e dalë nga zgjedhjet do kërkojë me një zë hapjen e negociatave në Bashkimin Europian”, u tha Rama gazetarëve të pranishëm, duke theksuar se tashmë pengesa krysore, miratimi i vettingut, është tejkaluar.
“Do ta kërkojmë këtë me forcë, në kuptimin e një zëri të unifikuar dhe pastaj sigurisht që nuk i kemi të gjitha në dorë, sepse Europa në këto momente është ajo që është, dhe nuk është më e mira që do donim të ishte.
Rama nuk e fshehu se shpresat më të mëdha sa i përket hapjes së negociatave këtë vit, i ka te Gjermania.
“Shpresojmë shumë që pas zgjedhjeve në Gjermani gjërat do të jenë shumë më të qarta e Shqipëria do të hapi negociatat në fund të këtij viti, falë dhe marrëveshjes që ne kemi bërë në Shqipëri, falë dhe zgjedhjeve që sipas të gjitha gjasave nuk do të jenë dot të kontestuara”, tha ai.
Duke folur për raportet ndër rajonale dhe pengesat në rrugën e përbashkët të integrimit, ai tha se “Nuk ka një problem në nivel të raporteve. Ka dialog, komunikim, ndërveprim e një sens të përbashkët të së ardhmes që prevalon mbi të tjera. Pastaj, sigurisht që nuk mjafton vetëm vullneti ynë, por duhet dhe Europa të ketë vullnetin e saj e ne shpresojmë ta gjejmë këtë vullnet pas zgjedhjeve të 25 qershorit dhe pas zgjedhjeve në Gjermani”.
