Kryeministri Rama tenton të thellojë edhe më shumë ndarjen me LSI. Ai tenton të ftojë në këtë thellim të hendekut edhe Partinë Demokratike, të cilën e fton të vetme që t’i bashkohet në proceset e bashkëpunimit në Kuvend, amdje duke zgjedhur bashkë pasuesin e Ilir Metës. Fillimisht Rama tha se, ende nuk kanë një emër për Presidentin e ri, por ai theksoi se do ta konsultojë me PD-në këtë emër pas shkarikimit të Metës. “Shkarkimi i Metës nuk është i gjithi në dorën tonë, por do të bëjmë cdo gjë që ta votojmë në bllok shkarkimin.Nuk ka lidhje me asgjë tjetër vetëm me pozicionimin, që populli nuk do ta shikojë. Në çdo rast, qoftë para kohe, ne do konsultohemi me PD për zgjedhjen e presidentit të ri”, tha Rama në një takim në Pallatin e Brigadave me ekipin e socialistëve dhe me deputetët e rinj, të dalë nga zgjedhjet e 25 Prillit.
Kryeministri Edi Rama theksoi gjithashtu se, në mandatin e tretë ka gati një plan jo për të luftuar kundër PD-së por për të cuar deri në fund punën që kanë nisur. Ai tha se dorën do ta mbajnë shtrirë ndaj PD-së dhe do jetë gati që të bashkëpunojë me demkoratët. “ Kemi një plan shumë ambiciz. Ne nuk kemi marrë një mandat për të luftuar me PD por për të cuar deri në fund punë të mëdha, do ta presim PD deri kur të rivendosë lidhjen me realitetin, por jemi gati të bashkëpunojmë me demokratët. Do ta mbajmë të shtrirë dorën dhe nuk do lëmë rast pa ua treguar me vepra se kjo është dekada. Nuk do të thotë që do t’i kthejmë arenën debatit politik, do të vazhdojmë punën për të cilën shqiptarët na zgjodhën ne. Do të përkushtohemi që të afrojmë sa më shumë talente të reja”, tha Rama, duke lënë të kuptohet se, tashëm sheh vetëm PD-në përballë në betejën politike./ Tirana Today
