Kryeministri Edi Rama ka rikonfirmuar edhe një herë se do të rritet paga minimale. Nga Gjirokastra, kreu i qeverisë deklaroi se paga minimale e cila ishte parashikuar që të vendosej brenda mandatit, nuk është aplikuar, mirëpo do të punojnë për ta vënë në zbatim sa më shpejt të jetë e mundur. Gjatë takimit me operatorët turistikë në Gjirokastër, ai është shprehur se duhet të arrihet më shpejt paga minimale 400 mijë lekë. Rama u tha operatorëve turistikë se është koha për të paguar më shumë punonjësit, për t’i mbajtur në Shqipëri.
“Nga ana tjetër do të bëjmë çmos që edhe inflacionin e luftës dhe rritjen e çmimeve ta përballojmë më lehtë së bashku, duke vendosur më shumë financa në dispozicion të njerëzve të këtij vendi. Prandaj i kemi indeksuar dy herë pensionet dhe kemi bërë rritjen më të madhe të pensioneve këtë vit, 10%. Që nuk mjafton, nuk diskutohet. Po flas për rritje të gjithë duhet të më bëjnë skonton, sepse nuk jam duke thënë çohuni dhe duartrokisni.
Përkundrazi, duhet t’i rrisim dhe më shumë. Jemi mbrapa akoma për rritjen e pagave. Jemi mbrapa, jam i vetëdijshëm që jemi mbrapa. I kemi rritur se ishim me një distancë të madhe nga rajoni, por përsëri jemi mbrapa. Duhet ta rrisim më shumë pagën minimale.
Edhe juve, ju them është koha për të mos menduar më me logjikën e ‘hë se mbajnë këta’. Është koha për të paguar më shumë punonjësit për t’i pasur këtu, edhe për t’i kthyer këtu pse jo. Për t’i kthyer këtu nga Greqia. Vërtetë mund të marrin më shumë në Greqi, por paguajnë më shumë sepse nuk kanë shtëpi dhe nuk kanë shumë gjëra të tjera që atje duhet t’i paguash.
Por si do kthehen, në rast se paga nuk është minimalja më e lartë? Ne në programin e qeverisë e kishim që të arrijmë 400 mijë lekëshin brenda mandatit. Nuk është e mundur, duhet ta arrijmë më shpejt. Duhet ta arrijmë më shpejt pagën minimale 400 mijë lekë. Është e domosdoshme. Duhet të rrisim edhe më shumë pagat e të gjithë punonjësve dhe shërbëtorëve të shtetit. Prandaj nuk kemi bërë një paketë tjetër nga ato 2-3 mujoret, apo të përkohshme por kemi bërë një rritje që është e qëndrueshme”, u shpreh Rama.
