Shqipëria do të veprojë ashtu siç bëri Amerika dhe vendet e Bashkimit Evropian për të dëbuar diplomatë rusë nga vendet e tyre. Ky vendim vjen si kundërpërgjigje ndaj helmimit me gaz nervor të ish-spiunit rus në Britani.
Helmimi i ish-spiunit rus Sergei Skripal në Britani, ka bërë që vendet e Europës t’i vihen kundër Rusisë së Putin. Një vendim të tillë e ka marrë edhe kryeministri i Shqipërisë Edi Rama, i cili do t’i bashkohet vendeve si Britania, Gjermania e SHBA.
Në mbledhjen e grupit të Partisë Socialiste, kryeministri Rama paralajmëroi dëbimin e diplomatëve rusë.
“Qeveria do të vendosë për dëbimin e disa shtetasve rusë. Ky është një veprim i koordinuar me vendet e NATO-s. Do dëbojmë rusët që kanë shkelur interesat kombetare”-shkruan BW.
Sot, SHBA urdhëroi dëbimin e 60 diplomatëve rusë ndërsa Gjermania dhe Franca vendosën dëbimin e 4 diplomatëve rusë. Pak më herët Shtëpia e Bardhë ka thënë se presidenti amerikan, Donald Trump ka urdhëruar dëbimin e dhjetëra “zyrtarëve të inteligjencës” së Rusisë dhe ka urdhëruar mbylljen e konsullatës ruse në Sietëll.
Bazuar në raportimet e mediave numri i rusëve të dëbuar duket të jetë 60. Ambasadori rus në Uashington ka thënë se SHBA-ja është duke shkatërruar edhe ato pak marrëdhënie që kanë mbetur me Rusinë, ka raportuar Reuters, duke u bazuar në agjencinë e lajmeve RIA.
Presidenti i Këshillit Evropian Donald Tusk ka thënë se 14 shtete të BE-së kanë dëbuar nga vendet e tyre diplomatët rusë, pasi blloku e konsideron përgjegjëse Rusinë për helmimin e ish-spiunit rus, Sergei Skripal dhe vajzës së tij Yulia, në Salisbury në Britani të Madhe, shkruan rel.
