Kryeministri Edi Rama duke folur nga takimi elektoral përmbyllës në qytetin e Durrësit, përsëriti thirrjen për ndarje të së ardhmes nga e shkuara, ndërsa e cilësoi Shqipërinë si një vend të marrë peng për çerek shekulli.
“Të dielën ose të vazhdojmë me punë për të ndërtuar shtëpinë e shtetit ose do të kthehemi mbrapa. Boll e lamë Shqipërinë si Kalaja e Rozafës”, tha Rama, teksa u bëri thirrje qytetarëve të Durrësit, të bashkojnë votat në siglën e PS-së.
Ai u shpreh i bindur se me 25 qershor Shqipëria nuk do të jetë më peng i askujt. “Jam i sigurt, tha ai, se shërimi i kancerit që e mori peng Shqipërinë për çerek shekulli ka filluar”.
Fjala e Ramës në Durrës u karakterizua edhe nga notat e patriotizmit.
Ai foli me krenari për origjinën e tij durrsake ndërsa përmendi kontributin e stërgjyshit të tij, krah Dom Nikollë Kaçorrit në ngritjen e flamurit.
“Ne nuk jemi të pagabueshëm dhe pa të meta, por në dallim nga të tjerët jemi forca që e përfaqëson më me dinjitet këtë flamur kuq e zi”, shtoi ai.
Kryeministri përsëriti thirrjen ndaj zgjedhësve për të mos marrë në konsideratë alternativat që ofrojnë partitë e tjera, duke përmendur emrat e Bashës, Vasilit, Idrizit e Blushit.
