Kryeministri Edi Rama ka folur më në fund për një nga personat kyç në Policinë e Shtetit, konkretisht kreun e saj, Haki Çako i cili deri më tani ka rezultuar si i paprekshmi i kreut të qeverisë nisur nga skandalet e fundit në strukturat e policisë shqiptare.
Rama u pyet se përse kreu i Policisë së Shtetit, Haki Çako nuk dorëhiqet, nisur nga të gjitha skandalet që nga dyshimet për përfshirjen e ish-ministrit të Brendshëm, Saimir Tahiri në trafikun e drogës si dhe me fletë-arrestet e lëshuara për katër ish-drejtues të policisë së Vlorës.
“Së pari, as 2 as 27 nuk e zhbëjnë punën dhe përpjekjet dhe rezultatet e arritura nga mijëra të tjerë. Ne kemi deklaruar dhe më parë që do të bëjmë Vetting me policinë e Shtetit. Projekti i Vettingut në Policinë e Shtetit ka nisur që kur është vendosur Fatmir Xhafaj. Ambicia ime është që të kemi një polici si ajo e BE-së në mesataren e mirë evropiane. Kurrë nuk kam thënë çka kemi bërë mjafton dhe më kënaq”, u shpreh Rama në emisionin “360 gradë” të gazetarit Artur Zheji në “Ora News”.
Ndërkaq, ditën e sotme Ministria e Brendshme me anë të një deklarate për mediat bëri të ditur se nuk ka rënë në gjurmë të tre ish-zyrtarëve të policisë së Vlorës, për të cilët Prokuroria e Krimeve të Rënda ka lëshuar fletë-arrestet, duke treguar qartë dështimin e vetë policisë. Për këtë të fundit, Rama theksoi se do të kallëzohen të gjithë dekonspiruesit e këtij operacioni për vënien në pranga të tre ish-zyrtarëve të policisë. Ndërsa shtoi dosmosdoshmërinë e përforcimit të ndihmës nga ana e FBI-së për të cilën tha se po operon aktualisht në vendin tonë.
“Kam qenë unë në Uashington bashkë me Saimir Tahirin dhe u kam kërkuar SHBA-ve angazhimin e FBI-së. Sot është prezentë FBI falë kësaj këmbëngulje. Unë po punoj që të sjell forca të reja të FBI-së”, theksoi më tej Rama.
