Kryeministri ka sulmuar Prokurorinë e Krimeve të Rënda, duke e quajtur arbitrare kërkesën për arrestimin.
Kështu, Rama bëri me dije se grupi i PS-së do të votojë unanimisht kundër kërkesës për arrestimin e deputetit të Tahirit, ndërsa tha se do të pranojnë kërkesën e Prokurorisë për kontrollin e banesës, ndalimin e daljes jashtë shtetit, garancinë pasurore, detyrimin për t’u paraqitur në polici dhe për të qëndruar në një vend të caktuar, të cilat po ashtu i cilësoi si të papranueshme.
FJALA E RAMËS:
Ku bën vaki, në cilin shtet që t’i kërkohet të akuzuarit të provojë se nuk është fajtor? Është për të vënë kujën. O njerëz, e ka ndarë kjo botë këtë punë qysh në kohën e të drejtës romake, ai që akuzohet s’ka të drejtë të provojë që s’ka bërë asgjë. E ka ai që akuzon barrën të faktojë me prova dhe jo me bindjet e veta. Katundi ynë politik dhe mediatik jeton në barbari. I akuzuari nuk ka çfarë provon kur akuzuesi nuk jep asnjë provë për kauzat që ngre, pikë!
Shfaqje dramatike e prokurorisë. Prokurorët e kësaj çështje ta mbledhin veten, të mbyllin komunikimet me nxitësit e asaj farse. Ne do t’i japim një mbështetje serioze hetimit të tyre me votën tonë.
Jemi të bindur se kërkesa e prokurorisë për arrestim është e pamundur sepse është arbitrare, kërkesën për arrest e refuzojmë unanimisht. Për t’i dhënë prokurorëve mundësitë e nevojshme për kryerjen e një hetimi serioz, përfaqësia jonë ka nënvizuar pranimin e kërkesës së prokurorisë për:
- Dhënien e autorizimit për ndalimin e daljes jashtë shtetit
- Detyrimin për t’u paraqitur në policinë gjyqësore.
- Ndalimin dhe detyrimin për qëndrimin në një vend të caktuar
- Garancinë pasurore
- Kontrollin personal të banesës së deputetit Saimir Tahiri/ Tirana Today