Kryeministri Edi Rama ka folur sot lidhur me amendamentet e propozuara nga Partia Demokratike.
Gjatë fjalës së tij në foltoren e Kuvendit, Rama tha se Pd nuk ka asnjë vizion për të ardhmen e vendit dhe se propozimet janë marrë nga programi elektoral i 2005-ës.
Sipas Ramës, PD nuk do ua hedhë dot shqiptarëve, teksa iu referua propozimeve si të pabazuara në kuadrin ekonomik apo financiar, miratimi i të cilave do të sillte rritje të borxhit publik.
FJALA E RAMËS:
Kjo është një seancë për dokumentin më të rëndësishëm që votohet, për buxhetin. Kush e sheh, ndjek një muhabet pa lidhje ku një grup njerëzish qesharakë vazhdojnë të flasin me veten.
Për amendamentet e opozitës mbi buxhetin: PD nuk ka asnjë vizion alternativ për Shqipërinë, asnjë program për të ardhmen dhe nuk ka asnjë ide tjetër përveç atyre të vjetra të shkruara në programin elektoral në 2005.
Është një paketë propozimesh që bazohet e gjitha të programi elektoral i vitit 2005. Nuk ka asgjë të re, një grup parlamentar vjen dhe i propozon Kuvendit ide të 2005-ës. Zgjidhje të ofruara në programin e 12 viteve më parë, të cilat gjatë zbatimit në qeverisje rezultuan zgjidhje pa lidhje.
Mjafton të shikosh të gjitha propozimet dhe të bësh një kalkulim të thjeshtë: një tërësi propozimesh të papërgjegjshme që nuk marrin në konsideratë as kuadrin e sotëm ekonomik dhe as atë financiar, thjesht rreshtojnë një listë qesharake muhabetesh për t’ua hedhur shqiptarëve që na dëgjojnë dhe gjykojnë të gjithëve. Nuk ua hidhni dot!
Propozimet e tyre, rritje e menjëhershme me 10% e borxhit publik. Lista juaj e propozimeve e çon borxhin në 79%.
Gojën e keni plot me llum, të cilin e nxirrni kur të doni pa llogaritur dëmin që i bëni Shqipërisë dhe dëmit që mund t’i bëni vetes. I vetmi që lexon nga ju është Saliu, por e ka bibliotekën pa inventar dhe i ngatërron shpesh.
E dini që kemi parashikuar shpërblim të pensionistëve, që vini e na e propozoni këtu. TIRANA TODAY
