Nga qyteti i Vlorës ku prezantoi projektin e ri të aeroportit të Vlorës, kryeministri Edi Rama, gjatë fjalës së tij, tha se ndërtimi i këtij i aeroporti ishte një ëndërr e hershme.
Kreu i qeverisë tregoi edhe vështirësitë në fillime, pasi nuk kishte investitorë të interesuar. Ndërsa shtoi se ka qenë një ndër ndihmat e qeverisë turke, e cila sipas tij ka shprehur gatishmërinë për t’i dhënë një dorë Shqipërisë në këtë drejtim.
“Ky aeroport ishte një ëndërr shumë e hershme dhe një premtim i përsëritur rëndomë në fushata elektorale, por askush nuk e besonte të vinte dita që Vlora të kishte aeroportin e vet, sepse konteksti ishte shumë i vështirë. Nuk kishte investitorë të interesuar dhe përpjekja e parë u bë si rezultat i një gatishmërie nga ana e qeverisë turke për të na ndihmuar thjeshtë për të na dhënë një dorë që ta ndërtonim këtë aeroport.
Ajo që ka ndodhur me Vlorën është një histori e njohur, por nuk është fundi, është fillimi i transformimit. Unë marrë shumë mesazhe nga zona e padurimit vlonjat që sjellin fotografi nga lagja ku realisht jetojnë në kushte të vështira. Do të investojmë më shumë brenda qytetit. Pjesën kryesore e ka kryetari i bashkisë, është edhe pjesa më e vështirë, por nuk e detyroi njeri që të bëhej kryetar i bashkisë, kështu që do ta bëjë atë punë.
Po punohet për një projekt për ndërtimin e një tuneli të Llogarasë, se jo të gjithë kanë guximin dhe dëshirën për të hipur malit. Janë të rëndësishme, por patjetër që më e rëndësishme është Aeroporti Ndërkombëtar. Sot e shohim që ka jo pak shprehje interesi.
Akoma jemi në një proces të diskutimit të brendshëm për mënyrën se si do të procedojmë. Tani kemi dhe opsionin e përfshirjes së një kompanie të huaj dhe operimin e saj, por edhe për ta filluar vetë ndërtimin për të mos vonuar. Kemi përcaktuar vetë një shumë për fillim, për të filluar një garë me kompani të specializuara”, deklaroi Rama.
