Kryeministri Edi Rama ka dhënë një tjetër intervistë për median italiane, Rai News. Duke folur për vendimin e opozitës për të djegur mandatet, Rama tha se deputetët e opozitës po sillen si “kamikazë”, ndërsa shtoi se është gati për dialog.
Siç ka deklaruar edhe më parë, kryeministri përsëriti se opozita po vepron në mënyrë të tillë pasi e di që është humbëse në zgjedhjet e ardhshme përballë PS-së.
I pyetur mbi protestën e studentëve, Rama e cilësoi atë si një protestë të popullit për të cilën qeveria reagoi, ndërsa protestën e opozitës e lidhi me frikën e saj për humbjen e zgjedhjeve.
Çfarë tha Rama gjatë intervistës:
Është një veprim që nuk është bërë asnjëherë në demokracinë parlamentare, ku populli zgjedh përfaqësuesit e tij dhe të zgjedhurit duhet të respektojnë vullnetin e popullit.
Gjendja dhe niveli narko-trafik në Shqipëri
Ka pasur një heshtje në qeverinë e mëparshme lidhur me trafikimin e marijuanës në vend. Ne kemi bërë shumë për të zhdukur këtë fenomen, janë shifra të deklaruara nga Guardia di Finanza në vitin 2017.
Protesta e studentëve ishte protestë e popullit. Kishin arsye të drejta për të protestuar dhe ne i kemi dëgjuar. Kjo tjetra nuk është protestë e popullit, kjo është një protestë e një establishmenti dhe kanë të drejtë, sepse janë të dëshpëruar pasi nuk kanë shans për të fituar zgjedhjet e ardhshme. Në anën tjetër, ata janë shumë të shqetësuar për Reformën në Drejtësi që po dërgon para drejtësisë të gjithë ata që kanë shfrytëzuar postet politike.
Jemi në mazhorancë, jemi përpara në të gjitha sondazhet. Kush fiton drejton, dhe kush humbet bën opozitën, kaq! Nuk mund të pranohet presioni i llojit “Unë bëj kamikazin, nëse s’më jepni atë që dua”. Jemi gjithnjë gati të dialogojmë, jemi gjithnjë gati të dëgjojmë, por sigurisht duhet të qeverisim. / Përshtati Tirana Today
