Kryeministri i vendit, Edi Rama ka zhvilluar takimin e radhës me të rinjtë në qytetin e Elbasanit, nga ku u bëri thirrje për të votuar Partinë Socialiste.
Rama ka premtuar se gjatë këtyre 4 viteve të ardhshme, “Rilindja” do të rrisë nivelin ekonomik të shqiptarëve dhe do të shkëputet nga situata e falimentimit të bizneseve që trashëgoi nga Berisha.
“Shumë biznese falimentuan për shkak të borxheve, natyrisht ka nevojë që të rritet akoma më shumë, por sot rritet me 3.5% ndryshe nga 0.5% e ca që kishim. Shqipëria që duam është një Shqipëri ku ka drejtësi të barabartë për të gjithë dhe ka shtet që sillet njëlloj me të gjithë”, u shpreh ai.
Rama gjithashtu, nuk ngurroi të thumbojë edhe PD-në, ku ,sipas tij, deputetët e saj janë ngujuar në çadër.
“Që të rrisim ekonominë duhet të bëjmë shtet dhe të vendosim drejtësi dhe unë iu siguroj se sa më shumë rezistencë i bëjnë drejtësisë ata që janë ngujuar në çadër, aq më i bindur jam që drejtësia do të bëhet dhe vettingu nuk ndalet”, tha Rama.
Për kryeministrin, zgjedhja për të rinjtë që votojnë për herë të parë më 18 qershor është e qartë, pasi PS-ja bën shtet.
