Shteti shqiptar ka anuluar vitin e kaluar tenderin me tre vendburime pasi kompania që fitoi, Jurimex Kommerz u akuzua për lidhje me rusët.
Edhe kompania që fitoi tenderin këtë vit, Transoil Group rezultoi e përfshirë në lidhje me rusët.
Emisioni “Të Paekspozuarit” ka publikuar një email që kompania Transoil Group shkëmben me Gasprom.
Ajo që do shihni më poshtë është një notë verbale e shkruar nga Shefqet Dizdari, administrator i Transoil Group, si dhe njëherësh pronar i disa pikave exchange në Tiranë. Letra i është dërguar Zv. Drejtorit Ekzekutiv të Gazpromit rus, Vladislav Baryshnikov.
Mes rreshtave të kësaj letre shkruhet se administratori i Transoil Group ishte i kënaqur nga takimi që kishte zhvilluar në Shën Petersburg me Zv. Drejtorin e Gazpromit, ndërsa kishin biseduar për bashkëpunimin mes njëri-tjetrit.
“TransoilGroup nuk e ka fshehur kurrë interesin dhe qëllimin për të krijuar një marrëdhënie biznesi të hapur, të qëndrueshme dhe transparente me Gasprom ose bashkëpunëtorët tuaj si “Naftna Idustrija Srbje” në Novi Sad, me të cilën ne kemi nënshkruar një marrëveshje”, shkruhet në mail.
Nëse do të zbatohej i njëjti standard, atëherë qeveria shqiptare do duhej të ndërpriste marrëveshjen me Transoil Group për lidhjet me Gazpromin rus, njësoj siç bëri me Jurimex Kommerz./Dita
