Numri i qytetarëve që i ankohen kryeministrit Rama gjatë dëgjesave publike është rritur pas rastit të Beratit, ku e moshuara zgjidhi problemin kurse drejtori i ALUIZNI-t u shkarkua.Në dëgjesën që kryeministri Rama ka zhvilluar paraditen e sotme me banorët e Shkodrës, disa prej tyre kanë ngritur shqetësimet që kanë me procesin e legalizimeve.
Fill pas ankesës së një qytetari për problemin që kishte me legalizimin e një kati të godinës në pronësi të tij, (kat i ndërtuar pa leje), kryeministri Rama e ka thirrur direkt për sqarim kreun e ALUZNI-t në Shkodër.
“Rastin e Maxhit Alibalit e njoh. Ai ka bërë një kat tjetër përveç asaj që ka bërë me leje. Problemi është se leja është e certifikuar, dhe në momentin që është marrë kjo leje nuk është kompetenca jonë të ndërhyjmë. Duke qenë në këto kushte, pra e certifikuar nga zyra e Legalizimit, ne nuk mund të ndërhyjmë, kjo i kalon për kompetencë rrugës gjyqësore. Ne përgjigje zyrtare i kemi kthyer qytetarit”, sqaroi kreu i ALUIZNI-t në Shkodër.
“Nga pikëpamja ligjore ka të drejtë, nuk mund të veproje mbi një pronë të regjistruar. Duhet të uleni të tre bashkë me drejtorin e Hipotekës, bëni një rishikim të letrave dhe mos e torturoni qytetari”, tha kryeministri.
Por fill pas kësaj ka filluar të ndërhyje qytetari, duke mos e lejuar kryeministrit të mbarojë fjalën e tij.
“Je kundër kësaj që po them unë tani? Ke ngrënë kolpo? Hiqjani mikrofonin se nuk ndalon”, tha kryeministri.
“Dëgjo drejtor, do t’ia zgjidhni këtë punë nesër. Nesër në ora 4 do më çosh mesazh, u zgjidh problemi”, tha kryeministri.
Ndërkohë që dëgjesa publike ka vazhduar, kryeministri Edi Rama është përballur me një ‘kaos’, pasi qytetarët nuk respektonin radhën dhe të gjithë kërkonin mikrofonin për të shprehur problemin e tyre me shpresën se do merrnin një zgjidhje.
Në një moment kryeministri ka ndërhyrë ndaj një qytetari nga fundi, i cili po tundte disa letra që mbante në dorë.
“Ka mundësi të dëgjoj tjetrin? Ca mi tund ato letra se nuk shoh gjë unë që këtu… Ka mundësi të ulesh dhe të respektosh zonjën se mua nuk po më respekton”– iu kthye Rama.
