Kryeministri Edi Rama zhvilloi një bashkëbisedim me qytetarë të Tiranës. Gjatë fjalës së tij, Rama u shpreh se Shqipëria që ai gjeti kur mori pushtin, ishte njësoj si Shqipëria në të nesërmen e tërmetit.
Sipas tij, nëse në vitin 2013 populli nuk do të kishte vendosur të ndryshonte rrugën, Shqipëria nuk do të paguante dot më rrogat dhe pensionet.
Edi Rama: ”Sot punohet dyfishi i tokës bujqësore që punohej para 7 vitesh. Është një e dhënë që duhet t’i mjaftojë kujtdo që do të dijë se çfarë ka ndodhur me bujqësinë për të kuptuar ndryshimin. Kur ne erdhëm në qeveri në Shqipëri punoheshin 125 mijë hektarë tokë Eksportet bujqësore kanë pësuar rritje të vazhdueshme, kjo nuk është maksimumi. Në asnjë fushë nuk jemi në maksimumin tonë, por edhe bujqësia është njësoj si kantieri i ndërtimit.
Shqipëria që ne gjetëm ishte njësoj si Shqipëria në të nesërmen e tërmetit. Tërmeti në bujqësi, arsim shëndetësi kishte ndodhur gradualisht. Nëse në 2013 populli nuk do të kishte vendosur të ndryshonte rrugën, Shqipëria nuk do të paguante dot më rrogën dhe pensionet. Sot kemi pastruar shumë rrënoja të atij tërmeti, dhe na duhet të vazhdojmë më të gjitha ato që duhet për të pasur një territor të banueshëm cilësisht. Në bujqësi kemi nevojë të shtymë shumë fort përpara.’’
